الخوَه اللي تختلف مابين ليـل وبيـن يـوم

الخوَه اللي تختلف مابين ليـل وبيـن يـوم

الله يبعدهـا ويبعـد ليلهـا مـع يومـهـا

لاصار ماتبنى على زين العوايـد والسلـوم

يغنيك ربي عن عوايدها وشيـن سلومهـا

خوة طليقين اليمانـي والرياجيـل القـروم

تشفيك لامن الليالـي حضَـرت بهمومهـا

اللي ليا منه بدالك يالسنافـي مـن لـزوم

تفزع معك فزعة رجالن ماتموت عزومهـا

لاضاقت الدنيا عليك وبان للضيقـه رسـوم

من ضيقتك ضاقت عليهم يالشجيع هدومها

وان كان عينك من غثا الدنيا تملل ماتنـوم

عندي ضمان عيونهم ماتهتني فـي نومهـا

كذا يبينون الرجال الصادقين مـن الرخـوم

وكذا نعرف صقورها ياصاحبي من بومهـا

حنا بلشنا في مهايط بعض بيضان الهـدوم

اللي يحطون السما في راحتـك ونجومهـا

علومهم وقت الرخا ياحي هاذيـك العلـوم

تقول ذولا من شياطين العـرب وقرومهـا

وان لفَت الدنيا وحضَر وقت تشمير الكمـوم

في ذمتي ذمه تضيـع افعالهـا وعلومهـا

المرجله في كوم وافعال الخبل في وسط كوم

ماتجتمع واللي رفع سقف السما وغيومهـا

عشنا على الدنيا ولاعاشوا رديين العـزوم

اقولها والناس تفهمهـا حسـب مفهومهـا

وسلامتكم

صح لسانك اخوي

الله يعطيك العافيه